საღმრთო წიგნი :: წაკითხვის რეჟიმი

« გოდებანი 3 ^{[BIB - xx]} »

3:1	ალეფ. მე, კაცი მხედველი სიგლახაკისაჲ კუერთხითა გულისწყრომისა მისისაჲთა.
3:2	შემიწყნარა მე და წიაღმიმიყვანა ბნელსა და არა ნათელსა,
3:3	რამეთუ ჩემ ზედა მოაქცია, შეცვალა ჴელი მისი ყოველსა დღესა.
3:4	ბეთ. განკაფნა ჴორცნი ჩემნი და ტყავი ჩემი. ძუალნი ჩემნი დამუსრნა სრულიად.
3:5	აღაშენა ძჳნად ჩემდა, და მომიცვა გარე, თავი ჩემი.
3:6	რუდუნეულ-ყო, დამსუა მე ბნელსა შინა, ვითარცა მკუდარნი საუკუნენი.
3:7	გიმელ. აღეშენა მონად ჩემდა და არა განვიდე, დაამძიმა უღელი ქედისა ჩემისა.
3:8	და თუმცა რამეთუ ღაღად-ვყო და ვჴმობდე, დააყენა ლოცვა ჩემი.
3:9	და ყუნა გზანი ჩემნი მარმაროჲთა, და ალაგნი ჩემნი განრყუნნა.
3:10	დალეთ. და თუ დადარანებულ მექმნა მე იგი, ვითარცა დათჳ დადარანებული და ვითარცა ლომი ფარულსა შინა,
3:11	მდევნა მე განშორებულსა და განმჭრა მე, დამდვა მე უჩინოქმნილად.
3:12	გარდააცუა მშჳლდსა თჳსსა და გამწონა მე, ვითარცა განი, საისრედ.
3:13	ჱე. შეაწონა თირკმელთა ჩემთა გესლი კაპარჭთა მისთა,
3:14	ვექმენ საცინელ ყოველსა ერსა, გასაცხრომელ ვიყავ მათა მარადღე.
3:15	განმაძღო მე სიმწარითა, დამათრო მე ნავღლითა.
3:16	ოავ. აღმოფხურნა ქვითა კბილნი ჩემნი. და მაჭამა მე ნაცარი.
3:17	და განაყენა მშჳდობისაგან სული ჩემი, დამავიწყდა მე კეთილი.
3:18	და ვთქუ: წარწყმდა ძლევა ჩემი და სასოებაჲ ჩემი უფლისა მიერ.
3:19	ზაინ. მოვიჴსენე სიგლახაკისაგან ჩემისა და დევნულებისაგან სიმწარისა ჩემისა და ნავღლისა ჩემისა.
3:20	ჴსენებით მოვიჴსენენ იგინი. და დადნეს სული ჩემი ჩვენ ზედა.
3:21	ესე დავიდვა გულსა ჩემსა. ამისთჳს ვესავ მას.
3:22	ჱეთ. წყალობანი უფლისანი მრავალ არიან. არ მომაკლო მე, რამეთუ არ აღესრულნეს მოწყალებანი მისნი.
3:23	განაახლენ იგინი, ვითარცა ცისკარი, განთიადისა. განმრავლდა სარწმუნოებაჲ შენი განთიადთა.
3:24	ნაწილ ჩემდა უფალი, - თქუა სულმან ჩემმან, - ამისთჳს დაუთმობ მას.
3:25	ტეთ. სახიერ უფალი მოთმინეთა მისთათჳს, სულმან რომელმან იძიოს იგი.
3:26	კეთილ არს დათმენაჲ და სასოებაჲ მაცხოვარებისა უფლისაჲ.
3:27	კეთილ არს მამაკაცისა, ოდეს აღიღოს უღელი სიჭაბუკესა შინა მისსა მძიმე.
3:28	იოთ. დაჯდეს მარტოებით და დადუმნეს, რამეთუ აღიღო თავსა ზედა თჳსსა უღელი მძიმე.
3:29	მისცა მიწასა პირი თჳსი, უკეთუ არს სასოება თმენისა.
3:30	მისცეს მცემელსა მისსა ღაწჳ, განძღეს ყუედრებათა მიერ,
3:31	ხაფ. რამეთუ არა საუკუნომდე განიშოროს უფალმან,
3:32	რამეთუ დამამდაბლებელმან შეიწყალოს სიმრავლისაებრ წყალობისა მისისა.
3:33	არა მიუგო გულით გამო თჳსით და დაამდაბლნა ძენი კაცთანი.
3:34	ლამედ. დამდაბლებად ქუეშე ფერჴთა მისთა ყოველთა კრულთა ქუეყანისათა,
3:35	განდრეკად მშჯავრსა კაცისასა წინაშე პირსა მაღლისასა,
3:36	დაშჯად კაცი სასჯელსა შინა თჳსსა, უფალმან არა იხილა.
3:37	მემ. ვინ ესრეთ თქუა და იქმნა? უფალმან არა ამცნო.
3:38	პირისაგან მაღლისა არა გამოვიდნენ ძჳრნი და კეთილნი
3:39	რად დრტჳნავს კაცი ცოცხალი და მამაკაცი ცოდვისათჳს მისისა.
3:40	ნონ. გამოძიებულ იქმნა გზაჲ ჩუენი და გაიკითხა და მოვიქცეთ უფლისა მიმართ.
3:41	აღვიხუნეთ გულნი ჩუენნი მაღლისა მიმართ ჴელთა ჩუენთა დამკჳდრებულისა ცასა შინა.
3:42	ჩუენ ვცოდეთ, და უსჯულო ვიქმნენით და შენ არა ლხინება-ჰყავ.
3:43	სამეხ. ზედდაგუფარენ, გულისწყრომითა წარმდევნენ ჩუენ, მომკლენ და არა გუერიდე.
3:44	ზედდაჰბურე ღრუბელი მტკიცე თავსა შენსა ლოცვისათჳს წუხვად ჩემდა და განგებად,
3:45	სასიტყუელად და საზრახველად გუყვენ ჩუენ შორის ერსა,
3:46	ჳე. აღაღეს ჩუენ ზედა პირი მათი ყოველთა მტერთა ჩუენთა,
3:47	შიში და დასულება შეგუემთხჳა ჩუენ, აფხურა და შემუსრვა.
3:48	გარდამოსაქანელნი წყალთანი გარდამოადინნეს თუალთა ჩემთა შემუსრვასა ზედა ასულისა ერისა ჩემისასა.
3:49	აინ. თუალთა ჩუენთა ეურვების და არა დასცხრენ. ნუ იყოფინ ქარვება,
3:50	ვიდრე არა გარდამოიხილოს და იგულოს ზეცით.
3:51	თუალთა ჩემთა მოაკლდა სულსა თანა ჩემსა უმეტეს ყოველთა ასულთა ქალაქისა ჩემისათა.
3:52	სადე. მომნადირებელთა მომინადირეს, ვითარცა სირი მედად, მტერთა ჩემთა.
3:53	მოაკუდინა მღჳმესა შინა ცხორებაჲ ჩემი და ზედდადვა ლოდი ჩემ ზედა.
3:54	ზეშთაგარდაეცა წყალი თავსა ზედა ჩემსა, ვთქუ: განმაგდე მე.
3:55	კოფ. ვხადე სახელსა შენსა, უფალო, მღჳმისაგან უქუეშისა.
3:56	ჴმისა ჩემისა გესმა. ნუ დაჰფარავ ყურთა შენთა ვედრებისამო ჩემისა და ღაღადებისა.
3:57	შეწევნად ჩემდა მოეახლა დღე, რომელსა გხადე შენ. მარქუ მე: ნუგეშინინ.
3:58	რეს. საჯენ, უფალო, სასჯელნი სულისა ჩუენისანი, იჴსენ ცხორება ჩემი.
3:59	იხილენ, უფალო, აღძრვანი ჩემნი, საჯე სასჯელი ჩემი.
3:60	იხილე ყოველი შურისძიებაჲ მათი და ყოველნი გულისზრახვანი მათნი ჩემ ზედა.
3:61	სინ. მესმა ყუედრება მათი, უფალო, ყოველნი გულისზრახვანი მათნი ძალად ჩემდა.
3:62	ბაგენი ზედაღდგომილნი ჩემნი და წურთანი მათნი ძჳნად ჩემდა დღე ყოველ,
3:63	დაჯდომასა მათსა ზედამოიხილე. მე ვიქმენ საჭრტინავ მათდა.
3:64	თავ. იხილე ამპარავანება სულთა მათთა და მიაგე მათ, უფალო, მისაგებელი, უფალო, მახე გულისა მათისაჲ,
3:65	საქმეთაებრ ჴელთა მათთაჲსა მიაგე მათ. შეწევნა გულისა ჩემისა რუდუნება მათდა.
3:66	შენ იგინი სდევნნე რისხვითა და მოასრულნე იგინი ქუეშე კერძო ცისა, უფალო.

© 2010, გია შერვაშიძე